أنا شاب لكن عمرى ألف عام
وحيد لكن بين ضلوعى زحام
خايف ولكن خوفى منى أنا
أخرس ولكن قلبى مليان كلام
==============
عجبتنى كلمة من كلام الورق
النور شرق من بين حروفها وبرق
حبيت أشيلها فى قلبى ...قالت حرام
دة أنا كل قلب دخلت فيه اتحرق
================
ينبوع وفى الحواديت انا سمعت عنه
إنه عجيب ..وف وسط لهاليب لكنه
شقيت كما الفرسان طريقى ..لقيت
حتى الخنازير والكلاب شربوا منه
==================
يا قرص شمس مالهش قبة سما
يا ورد من غير أرض حب ونما
يا أى معنى جميل سمعنا عنه
الخلق ليه عايشين عايشين حياة مؤلمة
==================
أيش تطلبى يا نفس فوق كل دة
حظك بيضحك وأنت متنكدة
ردت قالتلى النفس :قول للبشر
ميبصوليش بعيون حزينة كدة
===============
على بعد مليون ميل من أرضنا
من الفراغ الكونى بصيت أنا
لا شفت فرق بين جبال وبحور
ولا شفت فرق ما بين عذاب أو هنا
================
نظرت فوق للنجوم وأنا ساير
رجليا عترت فى الحفر والحجاير
بقيت أقول وأنا عالتراب :ياسلام
مش بس عبرة أخدت لكن عباير
================
يا نجم نورك ليه كدة بيرتجف؟
هو أنت قنديل زيت ؟ أو تختلف؟
أنا نجم عالى بس عالى قوى
وكل ما انظر تحت أخاف أتحدف
===============
كروان جريح مضروب شعاع مالقمر
سقط من السموات فؤاده انكسر
جريت عليه قطة عشان تبلعه
أتاريه خيال شعراء ومالهوش أثر
=============
أنا كنت شئ وصبحت شئ ثم شئ
شوف ربنا قادر على كل شئ
هز الشجر شواشيه ووشوشنى قال
لابد ما يموت شئ عشان يحيا شئ
================
يامشرط الجراح أمانة عليك
وانت فى حشايا تبص من حواليك
فى نقطة سودة فى قلبى بدأت تبان
شيلها كمان والفضل يرجع إليك
=================
وقفت ساعة الصبح أغسل سنانى
قالت لى شايف قوتى ولمعانى؟
إيش تطلب اليوم منى ضحكت أسد ؟
ولا ابتسامة إعلانات أمريكانى؟
=============
وعجبى !!
صلاح جاهين