الماركيتيير الشاطر مش بس بيهتهم بالعملاء بتوعه، ده كمان بيتابع المنافسين بتوعه كويس أوي. وعشان تقدر تستفيد أكتر، لازم تبقى عارف انواع العملاء عشان تتعامل مع كل نوع بالطريقة المناسبة. وأكبر اسباب الخلل في فهم و دراسة العملاء هو تضييق المجال و تقليل انواع المنافسين


في اتنين خبراء في الادارة و التسويق إسمهم:ـ


(Donald Lehmann and Russell Winner)


عملوا نموذج كده لتقسيم انواع العملاء بطريقة سهلة بتساعد الماركتير في شغله و بتحسن جدا من نتايج دراسة العملاء، و النموذج ده اللي هنتكلم عليه في المقال ده إسمه نموذج ليمان و وينار بيدرس تقسيم أنواع المنافسة إلى 4 مراحل: المنافسة في صنف المنتج ، المنافسة في نوع المنتج ، المنافسة العامة في نفس السوق ، المنافسة في المصروف المخصص


ده كلام كبير أول محتاج شوية تفاصيل عشان نستفيد منه:ـ


المنافسة في صنف المنتج Product Form Competition
النوع ده طبعا بيكون واضح لأي ماركتير لانه بيتكلم على المنافسين اللي عندهم منتج فيه نفس المواصفات و القيمة اللي بتتقدم لنفس شريحة العملاء المستهدفين. و دول بنشبههم بالمتسابقين في سباق الخيول، نفس قوة الخيل و نفس حلبة السباق و اللي بيكسب هو اللي بيعرف يستغل مميزات الخيل بتاعه كويس و بيعرف يظهرها في الوقت المناسب بدون استعراض زائف


BHA__(يمنع عرض أرقام الهواتف بدون أذن الإدارة)_page


دراسة المنافسين اللي من النوع ده بيخليك تعرف ايه المميزات اللي عندك اللي تقدر تغلب بيها منافسيك و تقدر تعرف ايه افضل طرق التسويق المناسبة للشريحة المستهدفة من العملاء


المنافسة في نوع المنتج Product Category Competition
النوع ده بيكون أعم شوية من اللي فات و دي بتشمل مقدمي المنتجات المشابهة لمنتجك (وليس المماثلة) و اللي بتأدي وظيفة مشابهة برضوا للمنتج بتاعك بصرف النظر بقا عن الشريحة المستهدفة لكل واحد فيكم، زي مثلا دواء بتاع حساسية الجلد : منتج في صورة برشام بينافس منتج في صورة دهان للجلد ، رغم ان كل واحد فيهم ليه شريحة لكنهم في الاخر منافسين لبعض


وده احد الحاجات اللي بتفرق بين الماركتير الصاحي و الماركتير التقليدي، لانك هتقدر تزود عدد الشرايح المستهدفة بمنافسة عدد اكبر من المنافسين المشابهين لنوع المنتج بتاعك


المنافسة العامة في نفس السوق Generic Competition
النوع ده طبعا بيكون مرحلة عامة اكثر من اللي قبله لانه بيشمل جميع المنتجات اللي بتشارك منتجك في رضاء العميل في احتياج معين عنده ، يعني بتحقق هدف واحد حتى لو مكنوش من نفس النوع ، زي مثلا واحد نفسه ياكل شيبسي على سبيل التسلية بعدين راح للسوبر ماركت لقى ان في كيس مكسرات شكله حلو فراح مجربه


فالماركتير الصاحي لما يبقى فاهم كده هيبقى عايز يوصل انه افضل حلول التسلية عند العملاء عشان تنسى اي نوع تاني او منتج تاني العميل ممكن يفكر فيه


المنافسة على المصروف المخصص Budget Competition
ودي أخر مرحلة و الأكثر عمومية، لانها مش بس بتشمل الحاجات المشتركة في رضاء احتياج معين عند العميل ، لأ ده بيتكلم على الاحتياجات المختلفة اللي بتحقق نفس الشعور العام للعميل


ممكن تتخيلها بطريقة تانية: لو في واحد شايل فلوس عشان يشتري بيها موبايل ، فهو بيخصص مصروف معين بيحوشه عشان يشتري الموبيل ده، بس في الاخر ممكن تلاقيه اشترى بلاي ستايشن لانه حس ان المميزات اللي هياخدها اكتر و هيقدر يمشي نفسه بموبايله القديم. لكن لو واحد عايز يشتري غسالة لمراته مستحيل يبدلها بقميص و بنطلون .. بصرف النظر عن انه هيتخلع من مراته بس المنتجين دول غير متنافسين